loading...
| 18.04.2017. ОШТРЕЊЕ

Ако на мајмунот за милион години му успеа да стане човек, Груевски и ДПМНЕ за само десет години, од човекот пак направија мајмун. Милина. Примитивизмот кој секој ден го гледаме по улиците, на медиумите и во Собранието многу зборува за нас како поединци и народ. Лажни моралисти, граѓански неосвестени аналфабети, преплашени робови и есапџии од најдолен вид: Сите нека цркнат, само мене да ми е добро! Ако сите умрете, нема кој да ме затвори оти сум крадел! Државата ја давам, мојата банкарската сметка во Белизе, не ја давам!

И додека по улиците маршираат разни здруженија од „ќосиња“ со поцрвенети носиња, што од ракија, што од рујно вино, а може и од кока, облечени во црни маици и кошули со крстови од пола кило околу вратовите, формирани и финансирани од вмроизираната тајна служба, кои отворено му се закануваат со истребување на секој цивилизиран граѓанин на државава кој не мисли дека Македонија е нападната од Сорос и од странски жолти комбиња, во Собранието исто толку апсурдна драма. Пратениците од ВМРО си реплицираат самите на себе за да ја блокираат работата на Собранието, додека не истече мандатот на СЈО во јуни. За парите се работи. И за кожичката.

Претседавачот пак, Трајко Вељановски одбива да стане од своето столче, за пратениците од опозицијата да изберат нов претседател на Собранието. Опозиционерите џабе везат: Трајко стани! Кога Трајко не станува. А бе стани! Е не станувам! И тоа трае и трае и трае… Го чекаат изгледа да умре од природна смрт, за да го станат. Иако и тогаш, тешко ќе успеат да го одлепат од столчето. Двокомпонентниот лепак со кој е залепен за него е пресилен. Се вика: пари и власт.

Во меѓувреме и Ѓорѓе васкресе. Ваистина васкресе. Секогаш воскреснува со нова глупост. Само овојпат, попатно, така го закопа својот шеф Груевски, што и гробар би му позавидел. За странски медиум изјави: Коалицијата меѓу ДПМНЕ и ДУИ беше завршена работа, кога поѕвони телефонот и некој мистериозен глас нареди да ја раскинат! Со ова Ѓорѓе Иванов призна дека црвено-жолтата линија на тврдокорните ја папала маца, зашто Груевски со радост ја прифатил Тиранската платформа со двојазичност на цела територија, ама некој им се јавил на Албанците и им рекол: I don’t give a fuck што Груевски ви ја прифатил платформата, вие нема да го прифатите него.

Не дека нема вистина во тоа дека некој се јавил, зашто знаеме многу добро со кого Албанците најмногу гугукаат по телефон кога е криза во државава, но она што фасцинира е умисленоста на Иванов дека е херој кој открива дека вистина постои страшен заговор на светот против Македонија, кој ни завидува на нашиот потенцијал за раст во секоја смисла, па сака да не уништи. И згора на се, со триумфална озареност на тапоглавец кој фантазира дека ги знае најголемите светски геополитички тајни, кои никој друг не ги знае, ни порача, сами да откриеме кој се јавил. Ви велам, таква дилајла, мајка уште еднаш не раѓа. Само штета што освен нас, цел свет го знае истото. Дека Иванов е најглупавиот претседател на Балканот во последниве години. Ем е шуто, ем боде.

Но, треба да се биде оптимист. ДПМНЕ на чело со Груевски се распаѓа одвантре. Се разоткрија како крадци, лажговци и садисти. Секоја нивна патриотска кампања нанесе тежок срам за Македонија во локални, регионални и светски рамки. Настрана тоа што е грабеж, Скопје 2014 е најголемиот културен фалсификат во Европа на сите времиња. Заради него ни се смеат светски признати, архитекти, историчари на уметност, уметници и естети, а во политичка смисла, заради тој проект, ги загубивме добрите преговарачки позиции што ги имавме во спорот за името со Грција и им покажавме на европските и американските политичари кои дотогаш со симпатии гледаа кон нас, дека сме потешки будали и националисти од Грците.

Кампањата „Знаењето е моќ“ и нов универзитет на секое средсело, во збир со сите десертни вмровски реформи во образованието и со јаготката на врвот наречена „екстерно“, на крајот испорачаа поразителен факт дека во поглед на писменоста, од седумдесет тестирани земји, ние сме на завидното 68 место, со две третини функционално неписмена младинци. Тоа значи дека нашата младина чита ко со три кнедли во грлото, по математика тешко собира, освен ако не собира овци по бачила и митинзи и по некој лајк на фејсбук, а од биологија знае само дека тревата е најсвежа за пасење кога е зелена.

Кампањата „Имај трето дете“, мутираше во „После сите три прати ги во туѓина, ако немаат вмровска партиска книшка“. Кампањата „Осмели се! Почни свој бизнис!“, стана „Почни свој бизнис, за ние да ти го затвориме!“ Оние безброј странски инвестиции што ги најавуваа, не беа безброј, беа неколку и не беа странски, туку власта практично субвенционираше странски компании да дојдат кај нас, да отворат фабриче за да ја користат најефтината европска работна сила, како што еднаш Груевски ги опиша македонските работници, со цел да го максимализираат профитот. Девет илјади денари само за Груевски е плата, за секој човек со достоинство, тоа е понижување.

Ама достоинствените овде, сега се во дефицит. Поголемиот дел Груевски ги избрка со своите фушерајски дела и со својата амбиција преку тотална партизација да ја контролира цела држава, за да ја скрие својата неспособност и незгасливата жед непристојно да се богати на штета на сите нас. Ниту еден миг за време на своето владеење, Груевски не помисли да создаде стабилна, просперитетна Македонија и вистински образувана, ситуирана, достоинствена, демократски и граѓански освестена индивидуа. Нему не му беше важно да ги научи граѓаните сами да ловат риба, туку да ги направи потполно зависни, да коленичат пред него за да им фрли, не риба, туку трошки. Во неговиот диктаторски речник не постои зборот ЛИЧНОСТ или ПОЕДИНЕЦ, туку само НАРОД. Устата постојано му е преполна со тој народ, кој и не е некој народ, туку заслепена толпа негови клиенти, купени за малку или за многу пари. Зависи кој со колку се задоволил и колкава корист видел од него Груевски за да ограби што повеќе под маската на патриотизмот.

И сега, тие целосно обезличени, заглупавени, осиромашени, понижени и разчовечени поединци, без никаков морален компас, подложни на најефтини, но многу опасни манипулации, се втерани во толпа, водена од хушкачи и полициски доушници кои сакаат крв и би гинеле за Груевски и Мијалков, додека тие и понатаму го тераат магарето, по старо. Испумпуваат државни пари на егзотични острови и отвораат бензиски пумпи.

Некој ќе рече, нема такви глупаци кои би започнале со улични насилства кон неистомисленици само за да го спасат Груевски од одење во затвор. И тоа како има. Не заборавајте, многу од нив се толку хипнотизирани и лошо информирани од блеење само во вмровските медиуми, што навистина веруваат дека меѓународната заедница, во ова невреме исполнето со миграции и тероризам на европско тло, ќе дозволи создавање на трета албанска држава на Балканот, оти е исплашена од економскиот процут на македонската држава и воената моќ на потомците на Александар Велики и Ќосето. Толку е смешно, што е трагично. Ама оди објасни им на тапчовците дека трета албанска држава, автоматски значи почнување на нова балканска војна. Американците не се луди, башка најмногу мразат да фрлаат долари во ветер. А фрлија многу за да го стабилизираат Балканот и секако нема да дозволат, таму, некој теткаст самоумислен војвода како Груевски кој тверкува со газето на Халкидики, да ги стави во зијан.

Годините под власт на Груевски, се покажаа доволни, сите неопеани будали кои претходно ги криеја нозете ко змија, да ги пуштат далеку пред чергичето, а нивните довчерашни фикс идеи за македонштината, заради кои порано им се потсмевале, да станат државна политика на еден психопат и да ги воскреснат национализмите на Балканот од крајот на минатиот век, и тоа, замислете, во Македонија. Големо изненадување за светот е што гостопримливите, песнопојни Македонци одеднаш деволуираа и почнаа да бараат етнички чиста држава. Проблемите со нас нема  да се решат дури и да добиеме етнички чиста држава. Зашто последниве месеци покажавме дека во нас има толку омраза која може да запали не една, туку десет многу постабилни и етнички почисти држави од Македонија.

Не е етничкиот состав тој што една држава ја прави силна или слаба. До нејзините поединци е. Колку се тие разумни, образовани, морални и демократски свесни. Ако им го одземеш тоа и почнеш да им фрлаш банани во вид на платформи, жолти комбиња, сороси и стравови од странски служби и домашни предавници, кои ќе ги голтаат под хипноза од медиумите, ништо од мирот, ништо од иднината и ништо од државата. Може само, еден ден, да се разбудиме оградени со стакло, во вистинска стаклена менажерија, за да доаѓаат љубопитни туристи од цел свет да ги гледаат нашите мајмунлаци и да учат, како еден мал народ кој наследил држава на тацна, истата ја загубил заради својата неспособност и умисленост дека е нешто повеќе од тоа што е.

(4639)

Тим ЗА -0%
 
 
Тим ПРОТИВ 0%
Гласањето е затворено
  
Сашо Тасевски
Livada.mk е концепт на портал/блог каде сите поединци или организации може да објавуваат свои колумни, анализи, отворени писма, искуства, патеписи, хроники, поезија, раскази, рецепти, да објават некој настан во најава или некое свое аматерско или професионално видео. Ги очекуваме вашите материјали преку овој линк за да ги објавиме.

Tags:

27.06.2017. Ливада.мк
26.06.2017. Душан Димитров
27.06.2017. Ливада.мк

ОСТАВИ КОМЕНТАР

  • […] на актерот Сашо Тасевски е објавена на порталот Ливада Народен […]
    ( ОГЛУПИ, ПОТКУПИ, ПА ВЛАДЕЈ - Народен Глас 2017-04-18 13:56:18 )
  • Bravo Sasho! Sekoja chest za kolumnata.
    ( Анонимен 2017-04-19 10:31:53 )
  • Se slozuvam so se 100%
    ( Анонимен 2017-04-18 20:58:10 )
  • Hема коментари
    1. Bravo Sasho! Sekoja chest za kolumnata.
      ( Анонимен 2017-04-19 10:31:53 )
      Ми се допаѓа(3) Не ми се допаѓа(0)
    2. […] Целата колумна на „Ливада“ на следниот линк. […]
      ( Оглупи, поткупи, па владеј – Локално 2017-04-19 09:53:38 )
      Ми се допаѓа(0) Не ми се допаѓа(0)
    3. Se slozuvam so se 100%
      ( Анонимен 2017-04-18 20:58:10 )
      Ми се допаѓа(1) Не ми се допаѓа(0)
    Mени