Понекогаш забораваме да го цениме она што е наше, па таква е ситуацијата и со магичниот Охрид, но затоа искуствата на странците ќе нè потсетат какво богатство имаме.

Мија Дропуљиќ од Хрватска летово го посетила Охрид и своето воодушевување од бисерот на Македонија одлучи да го сподели со сите.

Годинава наместо на море одлучила својот летен одмор да го мине во Охрид. Многумина биле изненадени зошто донела ваква одлука, па на прашањето таа им одговара со 8 силни причини зошто и тие да појдат во земјата во кое сонцето вечно сјае и да го видат Охридското Езеро, бисерот на Македонија.

Мија ги открива 8-те причини зошто сите треба да го посетат Охрид:

Охридското Езеро

Сите слушнале за убавината на Охридското Езеро, но ако не сте биле таму немате претстава за неговата величественост и убавина. Никогаш нема да го заборавам мигот кога застанав на крајбрежјето на овој европски бисер и ја впивав неговата убавина кога шетав од центарот на Охрид, па до црквата Св. Јован Канео.

Охридското Езеро е уникатно затоа што има 200 ендемски видови од кои некои се стари и 30 милиони години. Тоа се вбројува меѓу најголемите, најдлабоките и најстарите езера во Европа, зафаќа површина од 358,2 квадратни километри и најголемата длабочина е 289 метри.

Градот

Од луксузни хотели до приватно сместување, во Охрид ќе пронајдете сè. Градот Охрид е богат со историја и се нарекува и балкански Ерусалим, затоа што некогаш имал 365 цркви, по една за секој ден во годината.

Денес нема толку, но дефинитивно најпопуларна е црквата Св. Јован Канео, чија локација во која било доба од денот го остава без здив секој посетител.

Мора да се посетат и античкиот амфитеатар, Самуиловата тврдина, од која има прекрасен поглед на езерото и градот со околината, потоа црквата Свети Климент и Пантејлемон, каде ќе го почувствувате духот на стариот Охрид во полн сјај.

Не заборавајте да се прошетате и во турскиот дел од градот, кој е помал од тој во Скопје, но е многу живописен.

Излет до Заливот на коските и манастирот Свети Наум

Задолжително е да појдете на излет со брод. На голем брод ќе ве чини 10 евра, а ако сакате поинтимна прошетка со луксузен глисер тогаш ќе ве чини 20 евра. Најпопуларна дестинација е манастирот Свети Наум, а на патот до таму ќе го посетите и Заливот на коските (Bay of bones).

Заливот на коските е археолошки локалитет на праисториска наколна населба и има платформа со реконструирани живеалишта со кој е прикажан начинот на кој некогаш се живеело. Ќе видите прекрасна тиркизна вода во која пливаат риби, па и по некоја водна змија.

Свети Наум е едно од најубавите места на Охридското Езеро и ќе ви пружи незаборавен поглед на езерото и неверојатни бои, кои ги создава изворот на реката Црни Дрим. Ако ви е топло, тука можете да се релаксирате и на плажа.

Македонската храна

Огромниот број на ресторани во Охрид со традиционална храна ќе ги задоволат и најпребирливите. Скара, домашен ајвар и пинџур се дел од работите кои не смеете да ги пропуштите. Се разбира, има и одлични пици и тестенини по ниски цени.

Рестораните во турскиот дел може не се фенси, но нудат неверојатни специјалитети. Додека шетате купете си и бурек и разладете се со неколку топки сладолед.

Залезот на сонцето над црквата Св. Канео

Еден семеен пријател од Австралија, кој постојано патува низ светот, ми кажа дека веќе 30 години не може да го заборави залезот на сонцето над црквата Св. Канео. И беше во право.

Моментот кога се палат светлата на старата црквичка, а езерото добива нежно розова нијанса која се меша со сина и тиркизна е оној миг кој се памети цел живот. Во тој миг заборавате на сè околу себе и помислувате колку животот понекогаш знае да биде убав.

Охридските бисери

Кога ќе пристигнете во Охрид познатите охридски бисери ќе ги видите на сите страни. Тајната на вистинските охридски бисери ја знаат само две семејства во Охрид, Талеви и Филеви.

Тие тајната за изработка на овој накит го пренесуваат на машките членови на семејството. Имаат специјален начин на изработка, па подобро е да купите прстен со мал бисер кој крие тајна, отколку да купите некоја евтина копија.

Охридските бутици

Главната улица во Охрид има голем број на бутици во кои ќе пронајдете сè, од спортска облека до раскошни тоалети.

Луѓето

Секој кој ја посетил Македонија ќе биде дочекан со широка насмева од Македонците, чие гостопримство е надалеку познато, а би рекла и дека е влезено во легендите. Срдечни се, комуникативни и подготвени да ви помогнат – ќе ве освојат на прв поглед.

Искористете го времето во Охрид и Македонија за да зборувате со локалните жители затоа што тие ќе бидат тој X фактор кој ќе направи оваа земја да ја ставите на листата на свои омилени дестинации.

Нејзината репортажа.

Погледнете уште неколку фотки направени од Мија во Охрид:

(300)